Kënschtlerconcours - Maach mat !

Hues du Loscht, denger Kreativitéit fräie Laf ze loossen? Da maach mat bei eisem Concours, deen op ass fir jiddereen  – Grupp, Schoulklass oder individuell - an an eisem Kanton wunnt!

Déi éischt Editioun vun dësem Concours gëtt an Zesummenaarbecht tëscht der Kulturkommissioun vun der Gemeng Biekerech, der Kulturmillen a.s.b.l. an der Gemeng Biekerech organiséiert an zielt virun allem dorop of, déi lokal Konscht ze fërderen.

D’Iddi ass, dass däi Projet sech an eise kulturell räiche Patrimoine integréiert – sief et duerch säin historeschen, regionalen oder lokale Charakter. Wat eise Patrimoine genee ausmécht a wéi d’Kënschtler sech domat identifizéieren, ass komplett oppen – an aner Wieder: et gi keng Grenze fir deng Kreativitéit!

Modalitéiten

• Ausstellung: Déi ausgewielte Wierker ginn 2025 an 2026 an engem Konferenzsall an der Millen zu Biekerech op enger 8 Meter laanger Mauer ausgestallt.
• Gréisst: All eenzelt Wierk däerf maximal DIN A1 (594 mm x 841 mm) hunn. Et ass erwënscht, dass de Projet aus méi Wierker besteet, déi zesummen e kohärent Ganzt bilden.
• Thema: Keng thematesch Viraussetzungen! Loosst ärer Fantasie fräie Laf!
• Stil: All kënschtleresch Stiler sinn erlaabt – Molerei, Fotografie, digital Zeechnungen, asw.
• Leschten Delai: 30. Mee 2025

Kontakt: Schéckt är Propositiounen oder Froen zum Concours un: kulturkommissioun@beckerich.lu

Präis: 

D’Kulturkommissioun vergëtt 500 EUR/BEKI un den ausgewielten Kënschtler.

Expositioun an Eierung vum Gewënner

E Vernissage gëtt fir den ausgewielte Kënschtler an der Millen zu Biekerech organiséiert. De Gewënner gëtt och bei de Feierlechkeeten zum Nationalfeierdag geéiert.

Maach mat a feier d’Kultur an déi lokal Konscht!

Sief kreativ a inspiréier eis!