D’Musikschoul Kanton Réiden an der Chrëschtdagszäit

Wéi all Joer ëm d’Chrëschtdagszäit hunn eis Schüler fläisseg Auditiounen a Concerten doruechter gespillt. Auditiounen a Präsentatioune vun deenen ënnerschiddlechen Instrumenten-, Chant- an Theaterclassen konnt een déi läscht 2 Woche virun der Vakanz quasi all Dag bei eis an d’Musikschoul lauschtere kommen.

Eis 2 Chrëschtconcerte stiechen do nach eemol ganz besonnech raus:  

• D’Christmas Favourites, ënnert der Gesamtleedung vum Luc Rollinger, waren de 7. Dezember am Centre Culturel zu Useldeng. Festlech huet den Trompettenensemble déi sëllechen Nolauschtrer empfaang. Mir hunn dee Mëtteg déi bekannteste Chrëschtmelodien héieren, fir d’éischt vum Blechbléiserquintett an dono vun dem Sträichorchester. Och d’Kannerchorale huet de Publikum mat enger Rei vun hire « favourites » konnte begeeschteren, ier d’MKR Big Band eis mat e puer amerikaneschen Christmas-hits  agestëmmt huet. E feierlechen Ofschloss war dunn dem Leonard Cohen säi bekannten « Hallelujah » mat deene 5 Ensemblen op der Bühn.
• Den 13. Dezember war e weidere Concert vun der Réidener Musikschoul zu Noojem an der Kierch. Hei konnten de Clarinetten-ensembel, de Saxophons-ensemble an de Flûten-ensembel eng voll Kierch a Chrëschtstëmmung versetzen. Mat deem läschte Stéck A Family Christmas konnten si nach d’Kiischt op de Kuch setzen : extra fir dës Geleegenheet vum Luc Rollinger arrangéiert, hunn déi 3 Ensemblen sech zesummegedoen – Flûten a Clarinetten huet ee vu vir héieren an de Saxophonsensemble vum Duxsall. Dolby-Surround also.

Wéi Dir gesidd, am Dezember war fir jiddereen eppes dobäi.

Am neie Joer geet et mat engem chargéierte Programm weider. Enn Januar fänke mir mat den techneschen Examen un. Am Mäerz organiséiere mir dann 2 öffentlech Auditioune just mat Examensschüler.

Den 29. Mäerz invitéiere mir Iech da ganz häerzlech op eisen « MKR in Concert » am Festsall vum Atert-Lycée. No engem ganze Proufdag, kënnt Dir owes ganz nei Ensemblen aus der Musikschoul héieren.

Bis dohin wënscht d’Musikschoul Iech e flott a musikalescht Neit Joer 2025 !